Rama: Stacionet e ankorimit për mjetet lundruese, thelbësore për sigurinë në det

Gjatë sezonit të ri turistik veror në çdo bashki bregdetare të vendit do të ketë stacione të përcaktuara ankorimi për mjetet lundruese, me qëllim ekonomik dhe turistik.

Duke lajmëruar këtë fakt kryeministri Edi Rama shkruan në rrjete sociale se kjo është një masë thelbësore për sigurinë në det.

“Vazhdojmë përgatitjet e sezonit turistik veror, ku shumë të rëndësishme janë stacionet e ankorimit për mjetet lundruese me qëllime turistike dhe argëtimi, si masë thelbësore për sigurinë në det”, tha ai.

Sipas zotit Rama “çdo mjet i tillë detar do ta ketë të përcaktuar korridorin e lëvizjes dhe vendin e ankorimit”.

“Aplikimet për menaxhimin e përkohshëm të stacioneve të ankorimit për çdo bashki janë hapur sipas një procesi transparent të koordinuar nga Ministria e Turizmit dhe Mjedisit”, theksoi ai.

Ky është viti i parë që në bashkitë bregdetare të vendit, si Vlora, Saranda, Himara, Durrësi, Lezha etj., do të ketë stacione të ankorimit dhe bregëzimit për mjetet lundruese.