Ndarja nga jeta e Sabit Brokaj, Gurma: Kisha fatin që në rrugëtimin tim profesional e politik, ta kisha pranë në çdo moment të vështirë me këshillat e tij

Profesor Sabit Brokaj është ndarë nga jeta në moshën 78-vjeçare pas një ataku kardiak.

Kryebashkiaku i Sarandë Adrian Gurma ka shprehur ngushëllimet për ndarjen nga jeta të profesor Sabit Brokaj, mjekut dhe intelektualit të shquar, gjithmonë të angazhuar në çështjet kombëtare edhe si deputet e ministër.

“I trishtuar,për lajmin e hidhur të ndarjes nga jeta të Profesor Sabit Brokaj,mikut të shtrenjtë,kolegut të nderuar e mësuesit të dashur.

Kisha fatin e madh që në rrugëtimin tim profesional e së fundmi edhe në atë politik,ta kisha pranë në çdo moment të vështirë, me këshillat e tij të vyera,fjalën e matur,urtësinë,korrektesinë e largpamësinë që e karakterizonte si pak të tjerë.

Largohet fizikisht,duke lënë një boshllëk të madh te familjarët,miqtë e kolegët,por mbetet mes nesh me veprën e kontributin e jashtëzakonshëm profesional,patriotik e politik.
Ngushëllimet më të sinqerta për Mirën,Inesin,Krenarin,miqtë e të afërmit!

U prehsh në paqe Profesor Sabiti,
miku im i shtrenjtë,miku i të gjithëve”, shkruan Gurma.

Brokaj lindi në 7 janar 1942, në Vlorë. Nga viti 1959 deri në vitin 1964, Brokaj shërbeu si ndihmës mjekësor në një nëndetëse.

Pas diplomimit në fakultetin mjekësor të Universitetit të Tiranës në 1969, Brokaj vazhdoi të shërbente si shef mjekësor i një brigade në Shijak nga 1969 deri në 1972.

Nga 1972 në 1984, Brokaj punoi si kardiolog në spitalin ushtarak në Tiranë . Ai udhëtoi në Francë për të studiuar kardiologji në 1979 dhe ekokardiologjinë vitin 1982. Gjatë kësaj periudhe, Brokaj ishte një nga mjekët personalë të Enver Hoxhës.

Karriera politike

Brokaj hyri në politikën shqiptare pas rënies së diktaturës komuniste, duke u rreshtuar pranë Partisë Socialiste.

Fillimisht, shërbeu si Ministër i Shëndetësisë nga shkurti deri në Dhjetor 1991. Ai u zgjodh Deputet i Asamblesë Popullore në 1991, 1996 dhe 1997. Më 25 korrik 1997, Brokaj u emërua Ministër i Mbrojtjes, post që e ka mbajtur deri në vitin 1999.