Saranda, me rigjenerim urban në sezon

Në tre prej rrugëve kryesore mbi pedonale, Saranda ka bërë një transformim rrënjësor në infrastrukturë. Kjo verë e gjen qytetin e turizmit me imazh të ri fizik, që në fakt është një rigjenerim urban.

Rruga “Abedin Dino”, që nis prej shkollës “9 Tetori”, tek Bashkia e qytetit e deri në takim me qendrën e qytetit, ishte e para ku nisi shtrimi me gurë, të cilët japin imazh mozaiku dhe valëzimesh të detit.
E njëjta pamje është në këtë prag sezoni, edhe në të gjitha akset që qarkojnë Shatërvanin e Sarandës, Parkun “Miqësia”, Rrugën “Skënderbeu” etj., që gjithashtu iu nënshtruan rikonceptimit si rrugë pedonale, shtruar me mozaikë prej guri.
Çdo gjë ka nisur nga detyrat për sistemimin e nyjeve kryesore rrugore, për shtimin e pedonaleve të reja dhe restaurimin e atyre ekzistuese.

Projekti i ri ka të dallueshme se Saranda 2025 ka tashmë trotuare të dyfishuara në sipërfaqe, në dispozicion të kalimtarëve dhe rrugë, ku parkimi bëhet më i kontrolluar.

Investimi përfshiu edhe sistemimin përfundimtar të rrjetit të kanalizimeve, ndërkohë që ofrohet sistem bashkëkohor në ndriçimin publik, në gjelbërim dhe në elementë të tjerë arkitekturorë e urbanizues. Prandaj ai vlerësohet edhe nga qytetarët, si për bukurinë, edhe pastërtinë etj.

Me këtë investim rigjenerues, Saranda u shfaqet turistëve të kësaj vere, me një performancë të transformuar dhe si qytet miqsor.

Transformimi i ndodhur pritet të jetë me ndikim të drejtpërdrejtë jo vetëm në imazh te turistët vendas e të huaj, por edhe në lehtësinë e lëvizshmërisë në një qytet, ku turizmi është prioritet i parë. /Rtsh Gjirokastra/