Belinda Balluku publikon fotot nga segmenti Shijan-Ura e Gajdarit: Punimet janë drejt fundit

Punimet për rehabilitimin e segmentit rrugor Shijan-Ura e Gajdarit prej 5.5 km, pjesë e aksit Kardhiq-Delvinë janë drejt përfundimit.

Lajmin e bërii të ditur sot ministrja e Infrastrukturës dhe Energjisë, Belinda Balluku e cila publikoii disa foto nga punimet në këtë aks.

Balluku u shpreh se, “në segmentin Shijan-Ura e Gajdarit, pjesë e aksit Kardhiq-Delvinë, janë drejt fundit punimet rehabilituese për zgjerimin dhe rritjen e sigurisë të këtij segmenti”.

Sipas Ballukut, kjo ndërhyrje “do ta sjellë këtë segment në parametrat e duhur duke lehtësuar aksesin drejt Sarandës”.

“Po punohet me ritme të shpejta për të qenë gati për datën 2 korrik kur do të hapim për qarkullimin e automjeteve aksin Kardhiq-Delvinë”, theksoi më tej Balluku.

Ministrja e Infrastrukturës dhe Energjisë, Belinda Balluku inspektoi dje punimet në këtë segment, i cili do të hapet provizorisht për tu përdorur gjatë këtij sezonit veror.

Më pas, në muajin tetor në këtë aks do të shtrohet edhe shtresa e fundit asfaltike. Aksi është zgjeruar nga 6 metër në 10.5 metër. Po ashtu, është bërë rregullimi i kthesave dhe disa pjerrësive.

Duke nisur nga data 2 korrik edhe tuneli i Skërficës parashikohet të hapet për qarkullimin e automjeteve. Aktualisht po betonohen metrat e fundit të tunelit, ndërsa paralelisht po vijon puna edhe për sistemin e ndriçimit dhe atë elektromekanik.