“Kokat e prera”, historia e frikshme që përsëritet në Sarandë

Gjetja e një koke njeriu të groposur në fshatin Xarrë të Bashkisë Konispol, ka rikthyer sërish në vëmendje historinë e frikshme që përsëritet në Sarandë. E ndërsa policia prej mëngjesit të sotëm ka rinisur kërkimet në zonë por dhe hetimet për të zbuluar pjesë të tjera por mbi të gjitha për të identifikuar se kujt i përket koka, dy ngjarje të tjera mbeten ende të pazbardhura.

Në 8 tetor 2005, në vendin e quajtur “Vasilikua” në Konispol u gjet trupi i 45-vjeçarit, Zihni Myderizi. Trupit të tij i mungonte koka.

Ngjarja dyshohet se kishte si motiv larjen e hesapeve. Viktima varroset pa kokë dhe prej asaj date nuk është gjetur as koka e as autorët.

Hetimet janë kryer nga shumë sektorë të Policisë, madje hetimet janë shtrirë deri në Greqi por pa sukses.

Në 16 tetor 2008, në rrugën Turizëm – Kanali i Çukës në Sarandë, nga një grup fëmijësh u gjet një kafkë koke e dekompozuar. Kafkës i mungonte pjesa e poshtme e saj.

Në vendin e ngjarjes u gjetën edhe dy kocka të vogla. Prej asaj dite nuk është identifikuar as personi kujt i përkiste kafka e as shkaku i vdekjes.