Rama: Lançojmë së shpejti aeroportin e Sarandës

Aeroporti i Sarandës është një premtim i qeverisë dhe një vepër e rëndësishme që do të bëhet realitet shumë shpejt dhe pritet të ketë një impakt të madh në rritjen e turizmit dhe zhvillimin ekonomik.

Kryeministri Edi Rama bëri të ditur sot se, së shpejti do të lançohet aeroporti i Sarandës, i cili do të jetë një aeroport ndërkombëtar kryesisht sezonal, shumë i domosdoshëm për zhvillimin e ekonomisë dhe turizmit.

Në takimin me kryebashkiakët vendor në Pogradec, Rama u ndal në investimet e reja që po vijojnë në Vlorë dhe po ecim më së miri.

“Në Vlorë po ecin më së miri dhe investimet e tjera, jo vetëm ato që kanë përfunduar si Baypass-i, por flas për investime të tjera nga Orikum-Llogoraja, tuneli i Llogorasë, tek investimi fazës së dytë të Lungomares dhe i fazës së tretë që do ta çojë vijën e transformimit dhe të sjelljes në shekullin që jetojmë edhe të pjesës matanë në Radhimë drejt Orikumit”, tha Rama, teksa vuri në dukje se, ecuri pozitive e investimeve shihen edhe në të gjitha drejtimet e tjera që kanë të bëjnë me shërbimin shëndetësor, arsimin.

“Rruga e Lumit të Vlorës e cila dhe ajo është e përfunduar ka hapur një perspektiv për një zhvillim që deri dje ishte e pamundur të përfytyrohej sepse s’kishte asnjë akses në zonë e Labërisë. Edhe aty duhet bërë çmos që të ecim me vizion për të sjellë një turizëm tjetër që do të zgjerojë sezonin turistik edhe gjatë dimrit edhe për këto zona. Dhe këtu duhet të reflektojnë të gjitha bashkitë, sa i përket shtrirjes së turizmit në pjesën e brendshme”, tha Rama.

Gjithashtu theksoi kryeministri së shpejti fillon investimi për transformimin e pallatit të Sulos në një qendër novacioni.

“Në Vlorë po fillojmë transformimin e pallatit të Sulos në një qendër novacioni dhe kulture që do te jetë më e madhja në Shqipëri dhe në rajon për  atë natyrë pune që do bëjë. Projekti është bërë nga Fondi Shqiptar i Zhvillimit. Struktura është vendosur me arkitektet që të ruhet. Ky investim do të jetë një vlerë e shtuar”, u shpreh Rama.