Arrestohet i riu në Gjirokastër, kapet në flagrancë duke transportuar klandestinë

Specialistët e Seksionit për Hetimin e Trafiqeve të Paligjshme, në bashkëpunim me shërbimet e Policisë Rrugore, në vijim të punës për goditjen e aktivitetit kriminal të dhënies ndihmë shtetasve të huaj, për kalim të paligjshëm të kufirit, kundrejt fitimit, në bazë të informacioneve policore, kanë organizuar dhe finalizuar me sukses operacionin policor “Road Guard 26”, si rezultat i të cilit u arrestua në flagrancë shtetasi D. D., 22 vjeç, banues në Tiranë.

Në aksin nacional Gjirokastër-Tepelenë, në afërsi të fshatit “Humelicë”, shërbimet e Policisë kapën në flagrancë shtetasin D. D., duke transportuar me automjetin “Volkswagen”, 4 emigrantë të paligjshëm nga vendet MENA, kundrejt fitimit.

Në cilësinë e provës materiale u sekuestruan automjeti dhe 1 aparat celular. Materialet i kaluan Prokurorisë pranë Gjykatës së Shkallës së Parë Gjirokastër, për veprën penale “Dhënia ndihmë për kalim të paligjshëm të kufijve”.