Delvinë: Gjatë punimeve zbulohen tre predha, mendohet të luftës së dytë botërore

Tre predha artilerie janë zbuluar në zonën e njohur si “Mulliri i Bardhë”, në Delvinë gjatë punimeve për zgjerimin e rrugës Blerimas–Delvinë. Zbulimi është mëngjesin e kësaj të premteje rreth orës 10:20, nga punëtorët e firmës ndërtuese “Cobial”, gjatë punimeve për rikonstruksionin e segmentit rrugor.

Pas zbulimit është njoftuar policia e Delvinës e cila ka shkuar në vendngjarje ku konfirmuan praninë e tre predhave të vjetra artilerie, për të cilat paraprakisht dyshohet se mund të jenë nga të luftës së dytë botëtore.

Për të garantuar sigurinë publike, zona u rrethua dhe u mor nën mbikëqyrje nga forcat e rendit, ndërsa firma ndërtuese ndërpreu menjëherë çdo aktivitet në kantier. Ndërsa është kërkuar ndërhyrja e menjëhershme e forcave xheniere për të kryer një verifikim të plotë dhe për të asgjësuar në mënyrë të sigurt municionin e rrezikshëm.

Deri në ndërhyrjen e specializuar të njësive për çminim, zona do të qëndrojë e izoluar për të shmangur çdo rrezik për banorët apo punonjësit.