Deputetja e Sarandës kërkon dorëheqjen e Bora Muzhaqit: Tregoi se nuk është e denjë për detyrën që mban
Deputetja e Partisë Demokratike Ina Zhupa i ka kërkuar dorëheqjen e ministres për Fëmijët dhe të Rinjtë, Bora Muzhaqit, pas heshtjes së kësaj të fundit në lidhje me ngjarjen e rëndë që ndodhi në Fier, ku një fëmijë 8-vjeçar u vra nga një 38-vjeçar.
Sipas Zhupës, ministrja e Ramës për fëmijët shpëfilli me buzëqeshje dhimbjen e pamasë për vrasjen makabre të vogëlushit. Zhupa shkruan se është e revoltuar si nënë dhe si qytetare, kur sheh Ministren për Fëmijët që t’i përpalsë në fytyrë VKM-në e detyrave të saj. Ndaj shton ajo, ministrja duhet të japë dorëheqjen, sepse nuk është e denjë të bëjë politika për fëmijët.
‘Dy realitete krejt të ndryshme kishte sot në Tiranë. Familjarët e Mateos, të dërrmuar nga dhimbja, që kërkojnë ndihmën e qytetarëve për të firmosur kthimin e dënimit me vdekje dhe Ministrja e Edi Ramës për fëmijët, që shpërfill me buzëqeshje dhimbjen e pamasë për vrasjen makabre të vogëlushit.
Bora Muzhaqi ikën pa thënë asnjë fjalë për të, pa treguar aspak dhimbsuri, përulësi dhe përgjegjshmëri për detyrën e saj. Kur të shihni videon, jam e sigurtë se do të revoltoheni njësoj si unë. Dhe nuk e them këtë, sepse unë jam deputete e opozitës, që shoh më të këqijat tek qeveria.
Jam e revoltuar si nënë dhe si qytetare, kur shoh Ministren për Fëmijët të na përpalsë në fytyrë VKM-në e detyrave të saj. Zonja Ministre! Ju sot duhet të jepni dorëheqjen, sepse nuk jeni e denjë të bëni politika për fëmijët tanë! Jeta dhe mirëqenia e një fëmije është çështje shumë më e madhe sesa një VKM.
Por ju këtë zonja Ministre nuk mund ta kuptoni, sepse jeni në atë detyrë jo për meritën tuaj, por sepse Edi Ramës i duhet buzëqeshja juaj!’- shkruan Zhupa.
