Rama ndan pamje nga tuneli i Llogorasë: Pak javë larg hapjes së madhe

Tuneli i Llogorasë, një ndër veprat më të rëndësishme inxhinierike,  do të jetë i hapur për pak javë në të gjithë gjatësinë e tij.

Kryeministri Edi Rama publikoi sot në rrjetet sociale pamje nga ky kantier, ndërsa bëri të ditur se jemi pak javë larg hapjes së madhe të tunelit të Llogorasë.

Tuneli i Llogorasë ka një ndikim të madh për zhvillim ekonomik të jugut të Shqipërisë dhe lidhjen infrastrukturore që do të bëhet me aeroportin e Vlorës.

Puna për ndërtimin e tunelit të Llogorasë ka nisur më 14 nëntor të vitit 2021.

Me një gjatësi prej 5.9 kilometrash, tuneli i Llogorasë lidh Dukatin me Palasën për vetëm 7 minuta nga rreth 1 orë që është aktualisht nëpërmjet qafës së Llogorasë.

Krahas ndërtimit të tunelit, po punohet paralelisht edhe për ndërtimin e rrugëve lidhëse të kësaj vepre me akset rrugore kombëtare.

Tuneli i Llogorasë mbetet një nga veprat më të mëdha infrastrukturore në vend, i cili shkurton distancën drejt bregdetit të jugut, por rrit edhe sigurinë rrugore në këtë segment.