Shërbimi i urgjencës në Sarandë, masa shtesë për sezonin turistik

Në spitalin “Petro Nako” të Sarandës, Urgjenca është në çdo kohë porta e parë dhe treguesi i parë për nivelin e shërbimit shëndetsor që ofrohet.

Mjeku i Urgjencës Elton Habili tregon se ngarkesa ditore tani është 30-40 raste në 24 orë, duke i shërbyer popullatës nga disa Bashki, si: Konispoli, Finiqi e Delvina, përfshirë edhe një radhë fshatrash të Bregdetit, deri në Borsh.

Hyrja në sezonin veror, për Repartin e Urgjencës Sarandë do të thotë jo shtim të personelit, por shtim të masave për të përballuar shërbimin, që, sipas praktikës, shkon nga 100 në 200 pacientë që kanë nevojë për shërbim mjeksor

Çdo ditë dhe çdo natë në Urgjencën e spitalit të Sarandës ka ngarkesë. Çdo 24-orësh vihet në provë gatishmëria e mjeteve dhe e bluzave të bardha, për t’u dhënë rrugë të gjitha rasteve që paraqiten. Vetëm 1 deri 2 minuta pas marrjes së telefonatës te Urgjenca, autoambulanca niset për tek i sëmuri, sado larg që të ndodhet.

Saranda vazhdon të jetë një qytet në rritje e kjo përkthehet në nevojë të rritur për të marrë shërbimet mjekësore në kohën dhe me kompetencën e duhur.
Ndërsa sezoni veror, që është në prag, vlerësohet edhe si pragu i një pune të shtuar në shërbim të banorëve dhe pushuesve. (Thoma Nika)