Plagosja e 17-vjeçarit në Sarandë, babai i të miturit: U godit me tre leva në kokë, është në gjendje të rëndë

Babai i 17-vjeçarit, i cili u plagos me thikë ditën e enjte në Sarandë nga një 18-vjeçar ka dhënë disa detaje në lidhje me ngjarjen. Shkak i këtij konflikti dyshohet të jetë bërë një vajzë. Sipas babait të të miturit ky është konflikti i dytë i ndodhur midis dy të rinjve.

Ai tha se djali i tij ndodhet në gjendje të rëndë. Më tej ai shtoi se ai ishte goditur nga autori me tre leva në kokë dhe me bishtin e thikës dhe se në momentin e ngjarjes djali kishte qënë duke kaluar me shokun e tij dhe vajza i kishte buzëqeshur. Babai i 17-vjeçarit theksoi se ai nuk e njihte vajzën, dhe me autorin kishte tentuar të sqarohej.

“Gjendja e djalit është shumë e rëndë. Ky është sherri i dytë që është bërë.I pari ka ndodhur në datën 22 mars. Djali nuk na tregoi të vërtetën, ai na tha se kishte rënë nga shkallët.

Ai ishte goditur me tre leva në kokë dhe me bishtin e thikës. Ai kishte dalur xhiro me shokët dhe aty kishte kaluar një vajzë që i kishte buzëqeshur. Ato nuk njiheshin me njëri-tjetrin.

Djali dhe shoku i tij nuk e kanë ngacmuar atë. Autori e ka goditur djalin time me thikë edhe 1 javë para ngjarjes. Djemtë e kishin sqaruar të dashurin e vajzës që ato nuk kishin lidhje me të.Thika e përdorur është gjetur, por ja kanë ngarkuar djalit tim, kur e kishte ai në dorë ata ja kishin marrë”, tha ai në emisionin “Me Zemër të Hapur” në News24.

Gjatë bisedës babai tha se prindërit e autorit kishin shkuar tek shtëpia e tij, dhe i kishin kërkuar zgjidhje të problemit duke i ofruar para por ai nuk i kishte pranuar.
Ai tregoi se autori ishte një fëmijë me probleme, ka plagosur edhe djalin e kushëririt të tij.

“Unë kam kërkuar që të hapen kamerat, por nuk kanë ndodhur. Ne e morëm vesh ngjarjen nga shoku i djalit që na tha se ai ishte plagosur dhe ishte në spitalin e Sarandës.

Spitali i Sarandës na dërgoi në Vlorë për operim, por atje më thanë se nuk kishte nevojë. Prindërit e autorit kanë ardhur së bashku me djalin tjetër në shtëpi, dhe më kërkuan zgjidhje për problemin. Me ofruan para, gjakun s’e shes. Ai është një fëmijë me probleme, ka plagosur edhe djalin e kushëririt tim ” përfundoi babai i 17-vjeçarit.

Gjatë bisedës ka ndërhyrë edhe mamaja e 17-vjeçarit e cila ka deklaruar se autori i kishte prerë rrugën duke e goditur me levë. Ajo tha se ai asnjëherë nuk është përfshirë në konflikte dhe se në momentin që është plagosur, djalin nuk e kishte ndihmuar asnjë.

” Djali im nuk kishte lidhje me vajzën . Ai ka qënë duke dalur me shokët dhe autori i ka prerë rrugën duke e goditur me levë. Ne kemi shkuar në spital pasi shoku i tij na lajmëroi se ishte plagosur. Djali asnjëherë nuk është përfshirë në konflikte. Në momentin që është plagosur, djalin nuk e ka ndihmuar asnjë dhe kanë pritur ambulancën derisa ka ardhur policia. Ai nuk është mirë.” tha ajo.