Ina Zhupa takim me taksistët dhe shoqëritë e transportit në Sarandë: Qeveria i ka braktisur, zgjidhja është vota për PD
Sarandë – Deputetja e Partisë Demokratike Ina Zhupa zhvilloi një bashkëbisedim me përfaqësues të shoqërive të transportit dhe taksistëve të Sarandës, ku dëgjoi shqetësimet dhe kërkesat e tyre lidhur me problemet që përballin çdo ditë.
Sipas znj. Zhupa, taksistët janë të revoltuar dhe të shqetësuar për mungesën e vëmendjes nga ana e institucioneve shtetërore. Ata kërkojnë që licencat e taksive të mund të trashëgohen nga familjarët, si dhe që shtimi i licencave të bëhet vetëm me miratimin e sindikatës, për të ruajtur ekuilibrin e tregut. Një tjetër problem i theksuar ishte konkurrenca e padrejtë nga taksitë e qyteteve të tjera, automjetet e hoteleve dhe mjetet private që operojnë si taksi pa qenë të licencuara.
Zhupa deklaroi se programi i PD-së përfshin masa konkrete për të mbështetur këtë sektor jetik të ekonomisë lokale:
- Vendosjen e taksës së sheshtë 10%
- Ulje të çmimit të karburantit
- Luftë ndaj informalitetit
- Licenca që jepen me kritere të qarta, jo përmes lidhjeve klienteliste
- E drejta për të punësuar dhe për të trashëguar licencën
- Investime në infrastrukturë për transportin
- Ndërtimi i një terminali autobusësh në Sarandë, në vend të qendrave me dyqane që favorizojnë klientelën e pushtetit
Deputetja e PD-së paralajmëroi se taksistët janë të gatshëm të hyjnë në grevë nëse kërkesat e tyre nuk merren parasysh, ndërsa theksoi se “zgjidhja e vetme afatgjatë është ndëshkimi i kësaj qeverie përmes votës”.
“Vota për PD-ASHM është vota për ta, për punën dhe dinjitetin e tyre. Mjaft më me një qeveri që i masakron dhe i injoron.” – përfundoi Ina Zhupa.
