VIDEO/ Në shtëpinë ku lindi kryeministri, Delvina!
Një ditë kur të shkoni në Delvinë dhe të shihni çfarë ofron një nga qytetet më të patreguara të Shqipërisë, padyshim që duhet të shkoni edhe te shtëpia e kryeministrit Sulejman Delvina.
Sulejman Delvina ka qenë kryeministër në 1920-ën. Ai ishte patriot i madh, iu bashkua lëvizjes së Fan Nolit, lëvizjeve kundër Esat Pashë Toptanit, ka qenë ministër i Brendshëm dhe i Jashtëm, ka mërguar dhe më pas u kthye të vdesë në Vlorë.
Rudina Xhunga me stafin e DritareTV shkuan sot në shtëpinë ku lindi Sulejman Delvina, e cila vitet e fundit është rinovuar, por brenda janë ende mobiliet e kohëve të shkuara. Ama ajo shtëpi mbart një histori të jashtëzakonshme për Delvinën, por edhe për patriotizmin shqiptar.
“Kjo është dhoma e Sulejman Delvinës. Në këtë dhomë ka lindur kryeministri shqiptar, një prej njerëzve më të rëndësishëm të këtij qyteti. Kjo është dhoma e kryeministrit, e mobiluar me stilin e kohërave të shkuara. Përfytyroni një shtëpi e tillë të kthehet në bujtinë. Bujtina Sulejman Delvina.
Delvina kërkon fabul sepse njerëzit i ka. Thjesht janë duke punuar në Greqi. Nëse kthehen dhe i hapin këto dyer ky vend do t’ju magjepsë. I keni të gjitha, keni ajrin, keni bimët medicinale, njerëzit punëtore, e keni edhe fabulën. Hapini këto dyer, kthejini në bujtina, që njerëzit të mos dynden në Sarandë, por të vijnë të pushojnë në Delvinë! Nga shtëpia e Sulejman Delvinës ju them u hapshin të gjitha shtëpitë që kanë një histori në këtë vend.”
Ishte ky mesazhi i gazetares Rudina Xhunga nga dhoma ku lindi Sulejman Delvina, atdhetari shqiptar.
