I kërkoi Rama të drejtojë Himarën? Vangjel Tavo: S’ka asgjë të vërtetë në lajmet greke! Nuk angazhohem më në politikë

Gazeta greke “Kathimerini” shkruan se kryeministri shqiptar Edi Rama ka nisur bisedimet për të gjetur një kryetar provizor të Bashkisë së Himarës.

Sipas kësaj gazete i përzgjedhur është ish-deputeti Vangjel Tavo. Madje “Kathimerini” guxon edhe më tej teksa jep “detaje” nga një takim mes Ramës dhe Tavos.

Sipas “Kathimerini-t”, në prag të Krishtlindjes, ish-ministri dhe ish-deputeti i Dropullit për shumë vite, Vangjel Tavo, mori një telefonatë nga Edi Rama, i cili i kërkoi të takoheshin për “një kafe” në Tiranë.

Mirëpo ky lajm që buron nga Athina duket se është komplet i rremë.

Vetë Vangjel Tavo ka thyer sot heshtjen duke u shprehur se në lajmin e Kathimerinit nuk ka asgjë të vërtetë.

“Nuk ka asgjë të vërtetë në lajmet greke. Unë s’kam asnjë dëshirë që të angazhohem më në politikë” – ka thënë sot Tavo për News24.

Kujtojmë që së fundmi Tavo ka përjetuar një humbje të madhe, pasi vajza e tij vetëm 24 vjeç ndërroi jetë në një aksident.